Sigurimi i brendshëm i cilësisë është një detyrim ligjor i institucioneve të arsimit të lartë duke qenë përgjegjëse për hartimin e politikave dhe procedurave për sigurimin e cilësisë. Ky sistem, ngrihet nga institucionet e arsimit të lartë dhe funksionon nëpërmjet njësisë së sigurimit të brendshëm të cilësisë. Struktura dhe funksionet e kësaj njësie përcaktohen ne statutin e institucioneve të arsimit të lartë.

NjSBC harton standardet për sigurimin e cilësisë së brendshme në përputhje me Kodin e Cilësisë. Njësia realizon vlerësime periodike për veprimtarinë mësimore dhe kërkimore shkencore. Detyrë integrale e kësaj njësie është gjithashtu realizimi i pyetësorit të studentëve çdo fund semestri, mbi cilësinë e mësimdhënies për lëndët e çdo programi të ofruara nga IAL.

Kompetencat e Njësisë së Sigurimit të Brendshëm të Cilësisë janë:

• Të mbështesë Komisionin e Përhershëm për Sigurimin e Cilësisë Institucionale në hartimin e politikave dhe procedurave për sigurimin e brendshëm të cilësisë, akte të cilat miratohen nga Senati Akademik.

• Të mbështesë Komisionin e Përhershëm për Sigurimin e Cilësisë Institucionale në hartimin e standardeve për sigurimin e cilësisë, në përputhje me Kodin e Cilësisë. Të vlerësojë, në mënyrë periodike, rezultatet e veprimtarive mësimore dhe kërkimore shkencore në njësitë kryesore të Kolegjit, në përputhje me standardet.

• Të kryejë studime gjurmuese për të vlerësuar ecurinë e punësimit të studentëve dhe efikasitetin e programeve të ofruara nga Kolegji, në bashkëpunim me njësitë përkatëse. Të hulumtojë në lidhje me modelet e ndryshme, në kuadër të përmirësimit të cilësisë, që mund të merren si shembull dhe të shpërndahen në njësitë akademike dhe administrative.

• Të koordinojë zbatimin e standardeve të kontrollit të brendshëm, në përputhje me kuadrin rregullator të Kolegjit Universitar “Bedër”. Të përgatisë planin e veprimit të kontrollit të brendshëm dhe, kur është e nevojshme, të përcaktojë standarde të reja në institucion.

• Të rekomandojë qëllime dhe strategji institucionale.

• Të propozojë zbatimin e planit strategjik të institucionit dhe planin e veprimit. Të propozojë aktivitete për përmirësimin dhe monitorimin periodik në të gjithë institucionin.

• Të përgatisë rekomandime shtesë në udhëzuesit e NJSBC për përmirësimin e cilësisë dhe planifikimin strategjik të njësive akademike dhe administrative.

• Të vlerësojë dhe publikojë veprimtaritë e përgatitura nga njësitë për vlerësimin e shërbimeve akademike dhe administrative, zhvillimin e cilësisë dhe miratimin e standardeve të cilësisë.

• Të administrojë procesin e planifikimit strategjik në njësitë e miratuara nga Komisioni i Përhershëm për Sigurimin e Cilësisë Institucionale dhe ta përshtasë me ligjin për menaxhimin financiar dhe kontrollin, si dhe aktet e tjera nënligjore.Në kuadrin e planit dhe qëllimeve strategjike, të kryejë vlerësimin e shërbimeve administrative, zhvillimin e cilësisë, miratimin e standardeve të cilësisë dhe publikimin e rezultateve.

• Të njoftojë njësitë për vendimet e marra, të mbikëqyrë zbatimin e procesit të punës në kuadrin e sigurimit të cilësisë dhe të monitorojë rezultatet e kësaj pune.

• Të ndjekë procesin e vlerësimit të brendshëm të institucionit dhe të mbikëqyrë përgatitjen e raportit të vetëvlerësimit.

• Të ndjekë përgatitjen e terrenit për “vlerësimin e jashtëm” të Kolegjit Universitar “Bedër” dhe të vërë në dispozicion të institucionit ose organizatës së vlerësimit të jashtëm çdo informacion të nevojshëm.

• Të ndjekë nga afër punimet e vlerësimit të brendshëm dhe të atij institucional, duke i koordinuar me masat e ndërmarra në kuadrin e planifikimit strategjik, përmirësimit dhe monitorimit periodik.

• Të japë sugjerime duke u bazuar në problemet e evidentuara nga analiza “SWOT”.Në fund të çdo semestri, para sezonit të provimeve, të organizojë pyetësorin studentor për cilësinë e mësimdhënies për lëndët e çdo programi studimi, në bashkëpunim me sekretarinë mësimore.

• Pas çdo vlerësimi, të raportojë para Senatit Akademik rezultatet dhe propozimet përkatëse.