Lektorë dhe studentë nga “Bedër” morën pjesë në Forumin e 5-të të Dialogut të Politikave Evropiane
Lektorë dhe studentë nga Kolegji Universitar “Bedër” morën pjesë në Forumin e 5-të të Dialogut të Politikave Evropiane (EPDF) “Të rinjtë dhe përfshirja sociale në qytete” i organizuar nga KAICIID në bashkëpunim me European Council of Religious Leaders/Religions for Peace Europe (ECRL/RfP), Network for Dialogue, Multicoloured Religions Rotterdam, OSCE Office for Democratic Institutions and Human Rights (ODIHR) dhe International Organization for Migration (IOM). Forumi u mbajt përgjatë datave 13-15 nëntor 2023 në Rotterdam, Hollandë.
Motoja e këtij forumi ishte: “të frymëzojmë, të lidhim dhe të angazhojmë” një gamë të larmishme palësh të interesuara, duke përfshirë aktorët fetarë, politikëbërësit, shoqërinë civile dhe të rinjtë, në misionin tonë të përbashkët për të nxitur qytete më gjithëpërfshirëse dhe harmonike në të gjithë Evropën. Ne synojmë të sigurojmë hapësira për mësim të ndërsjellë përmes dialogut në veprim dhe të ndërtojmë ura midis kulturave dhe feve.
Në këtë program morën pjesë rreth 120 përfaqësues të rinisë, shoqërisë civile, lidershipit politik dhe fetarë nga rreth 30 vende të ndryshme të Evropës. Nga Shqipëria morën pjesë si të ftuar Prof. Assoc. Dr. Genti Kruja, zv/president i Këshillave Ndërfetarë të Evropës (European National Interreligious Bodies), si dhe lektor në KU Bedër, PhD. Cand. Hysni Skura, lektor në departamentin e Shkencave Islame, si dhe znj. Nasibe Nur Karık, studente e vitit të parë në programin Master i Shkencave në Marrëdhënie me Publikun.
Gjatë pjesëmarrjes në këtë forum u prezantua eksperienca e dialogut ndërfetar në Shqipëri si dhe roli i të rinjve në ruajtjen dhe vazhdimësinë e saj.
Dita Ndërkombëtare e Filozofisë në Bedër
E Enjtja e tretë e Nëntorit është Dita Ndërkombëtare e Filozofisë. Bazuar në rëndësinë e kësaj disipline në formimin njerëzor, UNESCO e shpalli këtë ditë si të tillë në vitin 2002. Me rastin e kësaj dite Kolegji Universitar “Bedër” organizoi një panel diskutimi rreth filozofisë.
Fjalën e hapjes e mbajti Dekani i Fakultetit të Shkencave Humane dhe Drejtësisë, Prof. Asoc. Dr. Rahim Ombashi.
“Në shpirt, ku strehohet shpresa dhe arkivohet dashuria, sipas Platonit, dallohen tri pjesë: logjika, shpirtërorja dhe e dëshirueshmja. Përkojnë me tri virtyte: diturinë, guximin dhe urtësinë, secila prej tyre korrespondon me një pjesë të shpirtit”, citoi profesori.
Rektori, Prof. Dr. Gjergj Sinani referoi kumtesën “Pa filozofi nuk ka një shoqëri të drejtë dhe të denjë”.
“Themeli i filozofisë nuk ka nevojë të kërkohet larg. Ai ndodhet në faktin më të thjeshtë që Sokrati dhe Dekarti e kanë shprehur sipas mënyrës së tyre, kur i pari tha: “Njih vetveten” dhe i dyti: “Unë mendoj, pra unë jam”, u shpreh prof. Sinani.
Të pranishëm në diskutim ishin anëtarë të stafit dhe studentë të cilët drejtuan pyetje, ndanë pikëpamjet e tyre rreth filozofisë dhe diskutuan rreth kumtesës së vyer, që referoi rektori.
Instituti Shqiptar i Medias zhvillon trajnimin për Edukimin mbi Median dhe Informacionin
Instituti Shqiptar i Medias zhvilloi dy ditë rradhazi trajnimin për edukimin mbi median dhe informacionin me studentët e Kolegjit Universitar Bedër.
Trajnimi filloi me prezantimin e trajnerit Erlis Çela, i cili është edhe përgjegjës i Departamentit të Shkencave të Komunikimit në Bedër. Dr. Çela u ndal te rëndësia që ka edukimi për median dhe informacionin për të rinjtë në epokën dixhitale. Më tej, ai prezantoi disa teknika për identifikimin e lajmeve të rreme, përmbajtjeve të manipuluara, etj.
Trajnimi vazhdoi me profesorin e gazetarisë, Rrapo Zguri, i cili diskutoi me studentët rreth kontekstit të peizazhit mediatik dhe rrethanave, që e kanë theksuar nevojën për edukimin rreth medias dhe informacionit te qytetarët.
Ditën e dytë, trajnimi filloi me redaktorin Emirjon Senja, i cili është edhe lektor në KU – Bedër. Ai u prezantoi studentëve metoda praktike për verifikimin e çrregullimeve informative dhe trajtoi disa raste studimore lidhur me dezinformimin dhe manipulimin, që ndodh në hapësirën e rrjeteve sociale.
Trajneri tjetër ishte gazetari dhe eksperti i komunikimit, Lutfi Dervishi, i cili u shpjegoi me detaje studentëve kontekstin global për median dhe informacionin dhe u shpjegoi arsyet thelbësore pse duhet të jenë kritikë ndaj informacionit dhe të verifikojnë burimet e dyshimta.