Zhvillohet Konferenca e dytë Studentore në shkenca Islame
Studentët e Departamentit të Shkencave Islame organizuan sot konferencën e dytë studentore në Shkenca Islame, me temë: “Aspektet intelektuale në revistën Kultura Islame1939-1946”.
Në këtë konferencë u diskutua rreth historikut, vlerës dhe objektivave të kësaj reviste, ku morën pjesë nënkryetari i Komunitetit Mysliman të Shqipërisë, drejtori i Medresesë së Tiranës, profesorë dhe studentë të KU Bedër, si dhe nxënës nga Medreseja e Tiranës.
Konferenca u çel me lexim Kur’ani nga studenti Abdullah Ziba dhe më pas fjalën përshëndetëse e mori përgjegjësi i Departamentit të Shkencave Islame, Dr. Genti Kruja, cili bëri një prezantim të përgjithshëm rreth shtypit dhe periodikut mysliman pas shpalljes së Pavarësisë.
Nënkryetari i KMSh-së, z. Lauren Luli foli për sfidat që kanë kaluar vit pas viti organet e Komunitetit Mysliman dhe në veçanti shtypi islam. Po ashtu ai foli mbi nevojën e njohjes së revistave të vjetra, të cilat do ta pasurojnë botën tonë me historitë dhe kontributin që kanë lënë paraardhësit tanë.
Fjalën përshëndetëse e mori dhe drejtori i Medresesë së Tiranës, z. Ali Zaimi, i cili fjalimin e tij e fokusoi në rolin që luajnë periodikët në jetën e të rinjve, kontributin që ata mund të shfaqin me talentet e tyre, etj.
Më pas konferenca vijoi punën me dy seanca, ku studentët referuan lidhur me punimet e tyre.
Zhvillohet Konferenca e Dytë Ndërkombëtare në Studimet Islame
Departamenti i Shkencave Islame në Kolegjit Universitar Bedër zhvilloi Konferencën e Dytë Ndërkombëtare në Studimet Islame (ISCON), me temë: “Roli i gruas në shoqërinë moderne sipas këndvështrimit Islam”. Kjo konferencë u zhvillua në bashkëpunim me Komunitetin Mysliman të Shqipërisë dhe me Këshillin Botëror të Komuniteteve Myslimane. Konferenca mblodhi së bashku studiues nga vende të ndryshme të botës, akademikë, përfaqësues të institucioneve publike dhe shoqërisë civile, si dhe studentë.
Në seancën përshëndetëse ishin të pranishëm H. Skender Bruçaj, Kryetar i Komunitetit Mysliman të Shqipërisë, Prof. Dr. Ferdinand Gjana, Rektor i Kolegjit Universitar Bedër, Dr. Mohammed Bechari, Sekretar i Përgjithshëm i Këshillit Botëror të Komuniteteve Myslimane, si dhe znj. Loreta Aliko, Kryetare e Komitetit Shtetëror për Kultet.
Në fjalën e tij përshëndetëse Kryetari i KMSH-së, z. Bruçaj, u ndal në punën dhe kontributin e deritanishëm të institucionit që ai përfaqëson në ndërgjegjësimin e shoqërisë për rëndësinë dhe rolin jetik të gruas në stabilitetin dhe progresin e shoqërisë sonë.
“Në Shqipëri femrat myslimane janë aktive në jetën shoqërore në role të ndryshme, si mësuese, mjeke, inxhiniere, politikane etj, duke ofruar një model dhe një kontribut të rëndësishëm në progresin dhe mbarëvajtjen e shoqërisë sonë. Por, nga ana tjetër, është për të ardhur keq kur sheh se akoma ndeshemi me problemin e dhunës ndaj gruas, dhunës në familje, fakt ky që është një ndër shkaqet kryesore të numrit e lartë të divorceve në vend. Prandaj le të shërbejë kjo konferencë si një tjetër kontribut i rëndësishëm për forcimin e mëtejshëm të rolit të gruas në të gjitha sferat e shoqërisë”, tha z. Bruçaj gjatë fjalës së tij.
Sesioni vazhdoi më tej me fjalën përshëndetëse të Rektorit të Kolegjit Universitar Bedër, Prof. Dr. Ferdinand Gjana, i cili u përqendrua në kontekstin historik të zhvillimit të figurës së gruas në shoqërinë tonë ndër vite.
“Po të hedhim vështrimin pas dhe të shohim rrethanat historike të zhvillimit të shoqërisë shqiptare, figura e gruas shfaqet në përpjekje të përhershme për të fituar të drejtat e saj në familje dhe në shoqëri. Nisur nga kjo mendoj se të gjithë duhet të kontribuojmë, në forma dhe mënyra të ndryshme, për barazinë e gruas në të gjitha aspektet e jetës sociale. Mendoj se punimet e kësaj konference, ashtu si e shumë platformave të tjera të ngjashme të zhvilluara më parë, do të kontribuojnë akoma më shumë në konsolidimin e mëtejshëm të gruas në të gjitha sferat e jetës publike e sociale të shekullit në të cilin jetojmë”, theksoi Prof. Dr. Ferdinand Gjana.
Ndërsa Dr. Mohammed Bechari, Sekretar i Përgjithshëm i Këshillit Botëror të Komuniteteve Myslimane, si përfaqësues i këtij komuniteti në punimet e konferencës së sotme, falënderoi për bashkëpunimin Kolegjin Universitar Bedër dhe Komunitetin Mysliman të Shqipërisë, për bashkëpunimin në trajtimin e një teme kaq të veçantë, jo vetëm për shoqërinë shqiptare, por edhe atë globale gjithashtu.
“Referuesit e sotëm do të hedhin dritë mbi tematika të ndryshme që prekin përfshirjen social-kulturore të gruas myslimane në shoqërinë ku ato jetojnë. Një pikë mjaft e rëndësishme e kësaj konference është edhe evidentimi i zgjidhjeve më të aplikueshme për çdo problematikë aktuale të rolit të femrës në shoqërinë e shekullit 21”, tha Dr. Mohammed Bechari.
Më tej znj. Loreta Aliko, Kryetares së Komitetit Shtetëror për Kultet, ndau me të pranishmit fjalën e saj përshëndetëse.
“Gratë përfaqësojnë një kontingjent të çmuar për çdo sistem politiko - ekonomik, për vetë bagazhin e tyre intelektual, për intuitën e natyrshme që mbartin, për energjitë e pashtershme që posedojnë. Fuqizimi i gruas është parësor për zhvillimin e një shoqërie të shëndoshë, të hapur dhe gjithëpërfshirëse dhe për përshpejtimin e rritjes ekonomiko - sociale”, tha ndër të tjera znj. Loreta Aliko.
Konferenca u zhvillua më tej me referimin e temave të ndryshme që preknin aspekte të shumëllojshme të rolit të gruas sipas këndvështrimit Islam në shoqërinë e shekullit 21, të tilla si: “Kontributi patriotik, emancipues dhe kulturor i gruas myslimane në historinë e Shqipërisë”, “Divorci dhe dhuna në familje, plagë të shoqërisë moderne”, “Roli gruas në edukimin e brezave, bazuar në revistat kulturore islame”, “Analizë sociologjike e fesë, edukimit dhe familjes: shembulli i rolit të gruas në Islam”, etj.
Konferenca e 5-të Ndërkombëtare në Gjuhë dhe Letërsi Angleze
Kolegji Universitar Bedër në bashkëpunim me Universitetin e Tiranës, Burch University dhe British Council, organizuan Konferencën e Pestë Ndërkombëtare në Gjuhë dhe Letërsi Angleze. Në këtë konferencë pati pjesëmarrës nga Shqipëria, Kosova, Maqedonia, Greqia, Bosnje-Hercegovina, Bullgaria, Hollanda, Turqia dhe Amerika.
Gjatë seancave paralele të zhvilluara, pati një larmishmëri në prezantimet e punëve kërkimore të akademikëve pjesëmarrës, duke prekur tema dhe çështje të ndryshme, si dhe duke përcjellë ide dhe sugjerime të reja për dëgjuesit.
Departamenti i Gjuhës dhe Letërsisë Angleze tashmë e ka kthyer në traditë përfshirjen e studentëve duke iu dhënë mundësinë të prezantojnë punët e tyre kërkimore në të tilla konferenca, ku pati një numër të madh pjesëmarrjeje studentore. Prezantimet e tyre patën një impakt mjaft pozitiv si tek studentët e tjerë, ashtu edhe tek akademikët, të cilët kanë tashmë përvojë në këtë fushë.
Konferenca ndërkombëtare mbi dialogun ndërfetar
Kolegji Universitar “Bedër” në bashkëpunim me Ambasadën Austriake në Tiranë, Universitetin Katolik “Zoja e Këshillit të Mirë”, Kolegjin Universitar “Logos”, si dhe me komunitetet fetare në Shqipëri, organizuan Konferencën Ndërkombëtare mbi Dialogun Ndërfetar: “Shqipëria, Model i Bashkëjetesës Ndërfetare për Evropën?”
Në këtë konferencë morën pjesë kryetarët e komuniteteve fetare, klerikë, përfaqësues shtetërorë, akademikë, kërkues e teologë nga Shqipëria dhe Evropa. Konferenca u përshëndet nga ambasadori i Austrisë në Tiranë, z. Johann Sattler, Nunci Apostolik në Shqipëri, z. Charles John Brown dhe ministrja e Kulturës, znj. Mirela Kumbaro.
Seanca e parë e Konferencës u moderua nga kryetarja e Komitetit Shtetëror për Kultet, znj. Loreta Aliko, dhe në panel merrnin pjesë krerët e komuniteteve fetare: Kryetari i Komunitetit Mysliman të Shqipërisë, H. Skender Bruçaj, Kreu i Kishës ortodokse Anastas Janullatos, Kreu i Kishës Katolike, z. George Frendo, Kryegjyshi Botëror i Bektashinjve, Haxhi Dede Edmond Brahimaj, dhe Presidenti i Vëllazërisë Ungjillore, z. Ylli Doçi.
Në fjalën e tij, kryetari i KMSH-së u shpreh se bashkëjetesa dhe harmonia ndërfetare në Shqipëri është tipar që rrjedh nga pranimi i diversitetit, respektit për përkatësinë e besimeve të ndryshme fetare dhe respektit për vlerat, historinë, dhe trashëgiminë tonë të përbashkët. “Themelimi i shtetit Shqiptar, krahas sakrificave të shumëllojshme, është fryt edhe i kësaj bashkëjetese dhe harmonie ndërfetare. Sepse mes përfaqësuesve kryesorë që kontribuan në formimin e shtetit Shqiptar ishin edhe prijësit fetarë të besimeve të ndryshme, apo edhe intelektualë të brumosur me besimet tradicionale fetare. Ne kemi trashëguar nga prijësit tanë fetarë, dashurinë për Zotin, për njeriun, dhe respektin për çdo qenie humane, pavarësisht ndasive që mund t’i karakterizojnë ata, si edhe detyrimin fundamental që të jemi në komunikim të vazhdueshëm me besimtarët e feve të tjera dhe te respektojme secilin ne pozicionin e tij”, tha ndër të tjera Bruçaj.
Në fund të këtij paneli kryetarët e komuniteteve fetare nënshkruan deklaratën e angazhimit të përbashkët për dialogun ndërfetar në Shqipëri.
Më pas konferenca vijoi me panelet e tjera, ku pedagogë nga të tria universitetet, teologë, studiues të huaj referuan me temat e tyre.
KU Bedër zhvillon ICESS 2018
Fakulteti i Filologjisë dhe Edukimit, Departamenti i Shkencave të Edukimit në Kolegjin Universitar “Bedër”, në bashkëpunim me Universitetin e Shkodrës “Luigj Gurakuqi”, organizoi për të gjashtin vit radhazi Konferencën Ndërkombëtare në Shkencat e Edukimit dhe në Shkencat Sociale: “Sfidat në Shkencat e Edukimit dhe në Shkencat Sociale për Shekullin e 21-të” .
Në konferencë morën pjesë rreth 40 referues nga 6 vende të ndryshme të botës. ICESS 2018 është një konferencë ndërkombëtare ndërdisiplinore, e cila sjell së bashku studiues, kërkues, lektorë dhe studentë të diplomuar për të shkëmbyer dhe ndarë me njëri-tjetrin eksperiencat dhe gjetjet e punës së tyre kërkimore, si dhe për të diskutuar mbi sfidat aktuale në fushën e shkencave të edukimit dhe të shkencave sociale dhe zgjidhjet e propozuara për tu përballur me këto sfida.
Punimet e konferencës u përshëndetën nga Dekania e Fakultetit të Filologjisë dhe Edukimit, dhe drejtuese e konferencës, Prof. As. Dr. Tidita Abdurrahmani, si dhe nga përgjegjësja e Departamentit të Edukimit në Universitetin e Shkodrës “Luigj Gurakuqi”, znj. Eranda Halluni, të cilat parashtruan disa nga problematikat që aktualisht shoqërojnë shkencat e edukimit dhe shkencat sociale në nivel institucionesh arsimore të arsimit të lartë dhe të arsimit parauniversitar.
Rektori i Kolegjit Universitar “Bedër”, Prof. Dr. Ferdinand Gjana ndau me të pranishmit rëndësinë dhe frytin që ka organizimi i aktiviteteve të tilla në fushën e edukimit dhe të shkencave sociale dhe vuri theksin mbi rëndësinë e edukimit si promotor kryesor në zhvillimin e ekonomisë dhe sigurimin e stabilitetit social. Ai shprehu besimin e tij se konferenca do të dilte me rekomandime të vlefshme për t’iu përcjellë politikbërësve në fushën e edukimit dhe të shërbimit social.
Punimet e kësaj konference i përshëndetën edhe përfaqësues të organizatave ndërkombëtare që operojnë në fushën e arsimit në Shqipëri, përkatësisht znj. Blerina Celoaliaj, drejtoreshë programesh në “Save the Children Albania”, dhe znj. Brisida Jahaj, eksperte edukimi në “World Vision Albania”. Tematika të tilla si arsimi cilësor dhe gjithëpërfshirës, edukimi global dhe nevoja për të kontribuar në formimin universitar të mësuesve të ardhshëm, u sollën në qendër të diskutimeve të këtyre përfaqësueseve të shoqërisë civile.
Në fund znj. Jahaj, e ftuar në cilësinë e folëses kryesore parashtroi studimin e World Vision Albania mbi analfabetizmin funksional, duke e shoqëruar me rekomandime për ndërhyrje sistematike për ta pakësuar këtë fenomen.
Zhvillohet konferenca e parë ndërkombëtare në shkencat islame
Kolegjin Universitar “Bedër” në bashkëpunim me Komunitetin Mysliman të Shqiptarisë organizuan sot Konferencën e Parë Ndërkombëtare në Shkencat Islame me temë: “Sfidat e myslimanëve në shoqërinë e shekullit XXI”.
Konferenca e zhvilluar në ambientet e KU Bedër mblodhi së bashku rreth 40 akademikë të fushave të ndryshme, të ardhur nga Kosova, Maqedonia, Mali i Zi, Bosnje Hercegovina etj.
Konferenca trajtoi problemet aktuale shoqërore të myslimanëve kudo në botë, duke ofruar zgjidhje me një vizion të qartë islam dhe social në dobi të integrimit të myslimanëve në shoqëritë ku jetojnë, duke u bërë faktor stabiliteti, paqeje dhe shprese për çdo vend.
Në fjalën e tij të hapjes, Kryetari i Konferencës, njëkohësisht edhe Përgjegjësi i Departamentit të Shkencave Islame në “Bedër”, Dr. Genti Kruja, pasi ju uroi mirëseardhjen të pranishmëve në aktivitet, u ndal në rëndësinë e trajtimit të problematikave të besimit Islam kudo në botë në platforma të tilla shkencore.
“Ndër sfidat më të mëdha, që përballet sot njerëzimi në përgjithësi dhe myslimanët në veçanti, pikë së pari vjen arsimimi dhe edukimi, të cilat lënë për të dëshiruar në shumicën e vendeve me popullsi myslimane. Myslimanët duhet t’i kthehen me urgjencë arsimimit dhe edukimit me frymën dhe edukatën islame, të gërshetuar me shkencat ekzakte dhe sociale bashkëkohore, sepse nga dituria dhe dija nuk vjen asnjë dëm, por vetëm se dobi, përparim, kulturë, mirëqenie dhe bashkëjetesë paqësore”, tha Dr. Kruja.
Ceremonia e hapjes vazhdoi më tej me fjalën përshëndetëse të Kryetarit të Komunitetit Mysliman të Shqipërisë, H. Skender Bruçaj, i cili u shpreh entuziast për kontributin e akademikëve pjesëmarrës në gjetjen e zgjidhjeve më të përshtatshme për një pjesë të problematikave aktuale të besimit Islam në Shqipëri, vendet fqinje e më gjerë.
“Para një shekulli, një dijetar mysliman i asaj kohe, theksonte se problematikat kryesore të myslimanëve janë tre: E para, varfëria, që i ka kapluar; e dyta, injoranca dhe mungesa e dijes; e treta, përçarja mes tyre. Pavarësisht se ka kaluar një shekull, duket se këto probleme vazhdojnë të jenë të pazgjidhura, madje janë shtuar e thelluar. Pikërisht kjo duhet të jetë sfida jonë kryesore si myslimanë, të përmirësojmë sa më shumë gjendjen tonë në aspektin shpirtëror, shkencor, kulturor e ekonomik dhe, si rrjedhojë, të shoqërisë në të cilën jetojmë. Lusim Allahun, që kjo konferencë, si një përpjekje modeste, të shërbejë për të hedhur dritë mbi sfidat që përmendëm dhe të japë zgjidhjet e duhura për problematikat e sotme”- theksoi ai gjatë fjalës së tij.
Më tej fjalën e mori Kryetarja e Komitetit Shtetëror për Kultet, Loreta Aliko, e cila vlerësoi institucionet që bashkëpunuan në organizimin e kësaj konference. Znj. Aliko u ndal në politikat mbështetëse të institucionit që ajo drejton në sigurimin e të drejtave dhe lirive kushtetuese të besimit në vendin tonë.
“Konferenca e sotme, por edhe organizime të tilla të ngjashme që janë zhvilluar në vitet e mëparshme, janë dëshmi e qartë se institucionet e kultit në vendin tonë po bëjnë një punë mjaft të madhe në ruajtjen e vlerave dhe traditave të të parëve tanë në konsolidimin e mëtejshëm të shoqërisë me vlera morale universale. Në këtë aspekt, mbështetja e Komunitetit të Kulteve do të jetë e pakushtëzuar sepse identifikimi dhe zgjidhja e problemeve identitare është në të mirën tonë të përbashkët”, përfundoi ajo.
Rektori i Kolegjit Universitar “Bedër”, Prof. Dr. Ferdinand Gjana, pasi ju uroi mirëseardhjen të pranishmëve dhe u shpreh entuziast për punimet e studiuesve pjesëmarrës, vuri theksin mbi gjendjen aktuale të myslimanëve sot në botë.
“Është detyrë dhe përgjegjësi parësore e të gjithëve ne, e myslimanëve kudo në botë, që fillimisht ta kuptojmë dhe jetojmë drejtë Islamin, ashtu siç është ai ne vetvete, paqësor dhe tolerant, e më pas të japim kontribut sado të vogël në qarqet e ngushta lokale me organizime të tilla të ngjashme”, tha në fjalën e tij Rektori i KU Bedër.
Pas përfundimit të fjalëve përshëndetëse, Dr. Mustafa Ceriç, President i Kongresit Botëror Boshnjak, Sarajevë dhe njëkohësisht i ftuari special i kësaj konference, ndau me të pranishmit një sërë aspektesh aktuale të temës në fjalë.
“Ne na intereson të jetojmë dhe të punojmë bashkë për shkak të origjinës, autoktonisë në këto treva ballkanike, fesë, kulturës dhe traditës që ne ushqejmë. Shpreh mirënjohjen time ndaj kryetarit të Komunitetit Mysliman dhe ndaj të gjithëve atyre të cilët me kontributin e tyre bënë të mundur organizimin e kësaj konference, sa të domosdoshme, aq edhe aktuale për nevojat e kohës në të cilën jetojmë. Ne si myslimanë jemi pjesë edhe e problemit edhe e zgjidhjes së situatës. Na takon ne të zgjedhim ku duam të jemi. Ne duhet të fillojmë të mësojmë të jetojmë të bashkuar në diversitet, ta respektojmë njëri-tjetrin ashtu siç themi që e duam për hir të Krijuesit”, tha Dr. Ceriç gjatë fjalës së tij.
Pas referimit të Dr. Ceriç, konferenca vazhdoi punimet në disa sesione paralele me tema të ndryshme, ku studiuesit pjesëmarrës ndanë me studentët dhe të ftuarit e tjerë të pranishëm tema të tilla si: “Arsimi fetar Islam në Shqipëri, përgjatë historisë”, “Roli i myslimanëve në shoqërinë evropiane”, “Përballja e Myslimanëve me Sprovën e Hipokrizisë në Shoqërinë e Shekullin XXI”, “Globalizmi, pluralizmi dhe kriza e identitetit”, “Domosdoshmëria e fesë në shoqërinë moderne” etj.