Kolegji Universitar Bedër, diplomon brezin e katërt të studentëve
Kolegji Universitar Bedër, diplomoi brezin e katërt të studentëve në një ceremoni të organizuar me këtë rast në ambientet e Muzeut Historik Kombëtar.
Përpos studentëve të shumtë të cilët hodhën në ajër kapelet e diplomimit duke mbyllur kështu një etapë mjaft të rëndësishme në jetën e tyre, në këtë ceremoni ishin të pranishëm Rektori i Bedër, Prof. Dr. Ferdinand Gjana, Kryetari i Komunitetit Mysliman të Shqipërisë z. Skender Bruçaj, Rektori i Universitetit Epoka Prof. Dr. Güngör Turan, personalitete të shumtë nga bota akademike, përfaqësues institucionesh publike e private si dhe familjarë e të afërm të të diplomuarve.
Tashmë në vitin e gjashtë akademik Bedër nxjerr në tregun e punës rreth 220 specialistë të rinj në fushën e Edukimit, Drejtësisë, Gjuhës dhe Letërsisë Angleze, Komunikimit, Shkencave Islame, Gjuhës dhe Letërsisë Turke etj.
Gjatë fjalës së tij përshëndetëse rektori i institucionit Z. Gjana uroi studentët e diplomuar dhe u shpreh entuziast për suksesin e arritur në këto tre vite. Më tej theksoi se dyert e institucionit që ai drejton do të jenë gjithmonë të hapura për mbështetjen e mëtejshme ndaj studentëve.
“Jini të sigurtë, ashtu si dhe prindërit tuaj se ne do të jemi pranë jush dhe me ju në çdo moment që do të keni nevojë”- tha ai.
Ndërsa z. Bruçaj u ndal në imazhin dhe cilësinë që ka ndërtuar Kolegji Universitar Bedër deri më tani. Ai i inkurajoi studentët e diplomuar që të përpiqen të gjejnë gjithmonë më të mirën në drejtimet që do të marrin në jetë.
“Ky institucion ju dha më të mirën e tij përgjatë gjithë programit të studimit, ju pajisi me aftësitë e nevojshme për të qenë më të mirët në tregun e punës, tashmë erdhi momenti juaj për ta dëshmuar këtë gjë”- përfundoi ai.
Ceremonia vazhdoi më tej me shpërndarjen e certifikatave të ekselencës sipas programeve të studimit. Ermelinda Gjeci, u vlerësua si studentja me mesataren më të lartë në programin Bachelor në Drejtësi, Xhorxhina Seferi si studentja më e mirë në Shkenca Islame, Ola Kafazi në Arsim Parashkollor dhe Fillor, Ersida Kurtaj në Psikologji Këshillimi dhe Pedagogji, Donisa Perseku në Shkenca Komunikimi, Zamira Aga në Gjuhë dhe Letërsi Angleze si dhe Enxhi Kamberi në Gjuhë dhe Letërsi Turke.
Më tej, të gjithë studentët e diplomuar në programet bachelor dhe master u ngjitën në skenë për të hedhur kapelet e diplomimit.
“Korniza ligjore për bashkëpunimin ndërshtetëror në menaxhimin e krizave të emigracionit dhe refugjatëve”
Departamenti i Drejtësisë në Kolegjin Universitar Bedër, në bashkëpunim me Fakultetin e Drejtësisë në Universitetin e Lubljanës, Slloveni, organizuan konferencën e parë Ndërkombëtare me temë: “Korniza ligjore për bashkëpunimin ndërshtetëror në menaxhimin e krizave të emigracionit dhe refugjatëve”
Në ceremoninë e hapjes së konferencës ishin të pranishëm zv. Ambasadorja e Republikës së Sllovenisë në Shqipëri, Ms. Masa Šiftari, Prof. Dr. Vasilka Sancin, zv. Dekanja e Fakultetit të Drejtësisë në Universitetin e Ljubljanës, Rektori i Institucionit Prof. Dr. Ferdinand Gjana, Përgjegjësi i Departamentit të Drejtësisë në Bedër, z. Ferdinand Xhaferaj, akademikë të ardhur nga vende të ndryshme të ballkanit, të ftuar specialë e studentë të shumtë.
Pas fjalës hapëse të kryetarit të konferencës z. Xhaferaj, ku pasi falenderoi të pranishmit për pjesëmarrjen në aktivitet dhe palën bashkëpunuese për të vënë në jetë këtë platformë të diskutimit të krizave aktuale në botë që kanë të bëjnë me emigracionin dhe refugjatët i’a la fjalën zv. Ambasadores Šiftari, e cila u shpreh entuziaste për bashkëpunimin e ngushtë jo vetëm në nivel shtetëror por tashmë edhe në nivel akademik ndërinstitucional ndërmjet Sllovenisë dhe Shqipërisë.
Më tej ishte radha e Rektorit të Institucionit z. Gjana, i cili pasi ndau me të pranishmit rëndësinë e menaxhimit të krizave të tilla në ditët e sotme, theksoi se e ardhmja e përbashkët duhet të ndërtohet nga kontributi i të gjithëve ne, prandaj gjetja e zgjidhjeve të mundshme për bashkëpunimin ndërshtetëror në menaxhimin e krizave të emigracionit dhe refugjatëve, është mision që duhet konkretizuar sa më parë.
Ndërsa zv. Dekanja e Fakultetit të Drejtësisë në Universitetin e Ljubljanës, Prof. Dr. Vasilka Sancin, njëkohësisht edhe folësja kryesore e konferencës, gjatë referimit ndau me të pranishmit një sërë problematikash të hasura në menaxhimin e krizave të emigracionit dhe refugjatëve.
Pas përfundimit të ceremonisë së hapjes punimet e konferencës vazhduan më tej në disa sesione të ndryshme paralele ku referuesit pjesëmarrës ndanë me të pranishmit një sërë aspektesh që lidhen jo vetëm me aktualitetin e krizës së emigrantëve por edhe me zgjidhet e implementueshme në çdo rast.
Ndër temat e shumta që u trajtuan nga të ftuarit përmendim: “Siguria kombëtare dhe e drejta për azil”, “Siguria ndërkombëtare e refugjatëve e parë në kontekstin e të drejtave dhe lirive themelore të njeriut”, “Implementimet legale në zgjidhjen e krizave të refugjatëve dhe sfidat për menaxhim”, “Parashikimi i emigrimit në ligjet ndërkombëtare” etj.
Zyra e të diplomuarve në Bedër organizon për herë të parë “Bedër Alumni Reunion 2017”
Ky aktivitet, i zhvilluar në “Sheraton Hotel Tirana” mblodhi sëbashku qindra studentë të diplomuar ndër vite nga institucioni ynë, prindër e të ftuar special, përfaqësues të medias, fushës së edukimit, komuniteteve fetare si dhe figura të njohura nga bota e artit dhe muzikës në vendin tonë.
Në fjalën e tij përshëndetëse, Rektori i Institucionit Prof. Dr. Ferdinand Gjana, pasi falenderoi të pranishmit për pjesëmarrjen, u shpreh i sigurtë se lidhja e institucionit që ai drejton me studentët e diplomuar vit pas viti do të jetë e fortë dhe do të ketë vazhdimësi të shëndetshme për të dyja palët.
“Aktiviteti i sotëm e shpreh qartë vendosmërinë tonë për të patur një marrëdhënie të fortë me studentët e diplomuar edhe gjatë jetës së tyre pasuniversitare” – tha ai.
Aktiviteti vazhdoi më tej me prezantimin e zyrës së të diplomuarve në institucionin tonë nga Ermira Shkreta, koordinatore e zyrës e njëkohësisht e diplomuar në Departamentin e Drejtësisë, e cila njohu të pranishmit me strukturën e zyrës, funksionin për të cilin është hapur kjo zyrë, aktivitetet e organizuara deri më tani si dhe planet afatgjata të saj.
“Qëllimi i zyrës është afirmimi i vlerave të institucionit ashtu siç konkretizohen nga të diplomuarit duke promovuar bashkëpunimin mes tyre dhe me studentët aktuale për të zhvilluar rrjetet profesionale, marrëdhëniet e mentorship-it dhe pjesëmarrjen nëpër aktivitete të organizuara nga institucioni” – tha ajo.
Pas disa minutave nën shoqërinë e violinistëve të shquar të Familjes Qerimaj, aktiviteti vazhdoi më tej me ndarjen e çmimeve, ku përpos çmimeve vlerësuese për studentët e diplomuar ndër vite nga institucioni ynë, në mbrëmjen gala u ndanë edhe disa çmime speciale për figura të njohura, për kontributin e tyre në sfera të ndryshme të shoqërisë tonë.
Me motivacionin për kontribut të veçantë në fushën e dialogut, bashkëjetesës dhe harmonisë ndërfetare dhe sidomos për iniciativën e bashkëpunimit në fushën e dialogut akademik midis tre shkollave teologjike: islame, katolike dhe ortodokse, Kryetari i Komunitetit Mysliman të Shqipërisë Z.Skender Bruçaj i dorëzoi Atë Mario Imperatorit çmimin për kontribut të veçantë në dialog dhe harmoni ndërfetare.
Z.Agron Tufa iu dorëzua çmimi për “Kontribut të veçantë në letërsinë shqipe” nga Rektori i Institucionit Prof. Dr. Ferdinand Gjana, me motivacionin për rrëfimin e gjallë e sugjestiv, plot imagjinatë në romanet e tij, me një regjistër të pasur figurativ, stilistik e gjuhësor, dhe për poezinë e ngjeshur ku shkrihen gjendjet liriko-filozofike tok me emocionin artistik.
Ndërsa z. Erlad Bakalli, Zv. Rektor i Universitetit të Arteve i dorëzoi Znj. Myfarete Laze çmimin për “Kontribut të veçantë në art, kulturë dhe paqe sociale” me motivacionin për kontribut të veçantë në promovimin e artit, kulturës dhe vlerave humane, për përcjelljen e dashurisë për jetën, lirinë dhe qenien më të përkryer, njeriun.
Për të vazhduar më tej me Z. Shaban Nexhi, të cilit i’u dorëzuar nga Dekani i Fakultetit të Shkencave Humane në Bedër Prof. Asoc. Dr. Rahim Ombashi çmimi për “Arritje të larta profesionale dhe kontribut në sigurinë e shoqërisë” me movitacionin për kontribut madhor në ruajtjen e rendit dhe sigurisë së vendit, për veprimtarinë e çmuar në promovimin dhe mbrojtjen e informacioneve dhe të dhënave personale si dhe nivelin e lartë të profesionalizmit të shfaqur në punë.
Me motivacionin për kontribut të veçantë në mbështetjen e kauzave sociale, në ndërgjegjësimin e shoqërisë për më shumë kujdes dhe ndihmë për individë dhe grupe shoqërore me probleme sociale dhe shëndetësore, Prof. As. Dr. Genta Skura i dorëzoi ish studentes së diplomuar në Programin Master i Shkencave në Marrëdhënie me Publikun Znj. Dhurata Hysaj çmimin për “Arritje të larta profesionale dhe kontribut në promovimin e vlerave humane”
Për të vazhduar më tej me çmimet vlerësuese që i’u ndanë studentëve të diplomuar ndër vite nga institucioni ynë.
Kështu “Çmimi i karrierës” shkoi për studenten e diplomuar në Drejtësi, Emsal Ajredini, me motivacionin “Për arritjet e spikatura profesionale, duke reflektuar shembullin e një profesionisteje të shquar në fushën e saj dhe duke u bërë burim frymëzimi për studentët, të diplomuarit e tjerë, si dhe për komunitetin në tërësi”.
Çmimi “Gruaja e suksesshme” i cili i’u dorëzua Ana Gjecit, studente kjo e diplomuar në Shkenca Islame, për mbështetjen, inkurajimin, bashkëpunimin dhe përpjektet e pakursyera në fuqizimin e rolit të gruas, si forcë e madhe e shoqërisë sonë, duke krijuar më shumë siguri sociale, politike dhe ekonomike për to.
Me motivacionin: “Për kontributin e çmuar intelektual dhe material ofruar për Kolegjin Universitar “Bedër” me ndikim në rritjen e reputacionit si dhe duke mbështetur brezat e diplomantëve dhe studentëve në integrimin më lehtë me tregun e punës apo me rrjetet profesionale.” Çmimi Bedër shkoi për Gazetarin e Vizion Plus, Osman Stafa, ish student i diplomuar në Shkenca Komunikimi.
Hysni Merja, i diplomuar në Shkenca Islame u vlerësua me çmimin “H.Vehbi Dibra”, për kontributin e vyer në arsim, shkencë, art dhe paqe sociale duke përçuar vlera morale, etike dhe universale në shoqërinë shqiptare dhe përtej saj në gjurmët e figurës së ndritur të H. Vehbi Dibrës.
Ndërsa çmimi “Eagle”, për veprimari të dalluar në ndërgjegjësimin dhe marrjen e përgjegjësive sociale në dobi të shoqërisë duke mbajtur gjallë vlerat kulturore kombëtare dhe duke kontribuar për kategoritë e njerëzve në nevojë, shkoi për Gazetaren e Radio Spektrum, Rabihana Halili, ish studente e diplomuar në Shkenca Komunikimi.
Aktiviteti vazhdoi më tej nën tingujt e muzikës së violinistëve të ftuar me këtë rast.
Ekstremizmi në shekullin e 21, Roli i Ligjit, Medias dhe Kulturës
Kolegji Universitar Bedër në bashkëpunim Universitetin e Barit “Aldo Moro” Itali, organizuan Konferencën e 5-të Ndërkombëtare në Shkencat Humane me temë: “Ekstremizmi në shekullin e 21, Roli i Ligjit, Medias dhe Kulturës”.
Ashtu si çdo vit tjetër konferenca mblodhi sëbashku akademikë, studiues, ekspertë e profesionistë të fushave të ndryshme për të ndarë ekspericena dhe përfundime kërkimore në aspekte të ndryshme që përfshin tema e këtij edicioni të konferencës.
Punimet e konferencës u përqendruan kryesisht mbi rolin e ligjit, medias dhe kulturës në fenomenin e ekstremizimit të dhunshëm. Këtë gjë e dëshmon edhe larmishmëria e punimeve, të tilla si: “Raportimi i tematikës fetare në median online”, “Liria fetare”, “Roli i dialogut ndërkulturor në shoqëri”, “Sundimi i ligjit në kundërshtim me ekstremizimin e dhunshëm”, “Parimi i drejtësisë për të parandaluar ekstremizimin”, “Pluralizmi fetar në burimin primar të Islamit” etj.
Pas sesionit të hapjes ku ishin të pranishëm një sërë personalitetesh përfaqësuese jo vetëm të institucioneve bashkëpunuese në organizimin e konferencës por edhe të fushës akademike, fushës së medias e më gjerë, konferenca zhvilloi punimet e saj në disa sesione paralele.
Zhvillohet Konferenca e 4-rt Ndërkombëtare në Gjuhë dhe Letërsi Angleze
Departamenti i Gjuhës dhe Letërsisë Angleze në Kolegjin Universitar Bedër, në bashkëpunim me Këshillin Britanik në Tiranë, International Burch University në Sarajevë si dhe Universitetin e Tiranës, organizoi Konferencën e 4-rt Ndërkombëatre në Gjuhë dhe Letërsi Angleze.
Ashtu si çdo vit tjetër, kjo konferencë mblodhi sëbashku studiues të shumtë të gjuhës, përkthyes, studentë dhe akademikë nga vende të ndryshme të botës, si: Amerika, Hollanda, Greqia dhe Maqedonia.
Punimet e konferencës u përshëndetën nga Dr. Isa Erbaş, Kryetari i Konferencës, i cili u shpreh entuziast për vazhdimësinë e suksesshme të kësaj platforme dhe prurjet e larmishme në fushën e gjuhës dhe letërsisë angleze si pasojë e punimeve të ndryshme nga akademikët pjesëmarrës.
Më tej, Rektori i Kolegjit Universitar Bedër, Prof. Dr. Ferdinand Gjana, vlerësoi bashkëpunimin e vazhdueshëm ndërmjet partnerëve në realizimin e edicionit të 4-rt të ICELL dhe theksoi se kontributi i institucionit që ai drejton në këto fusha do të jetë gjithmonë i vazhdueshëm dhe në shifra të konsiderueshme me organizime të tilla.